„Ég hef metnað til að spila á hæsta stigi og fékk það tækifæri með Víking og ákvað að hoppa á það," sagði Ragnar í viðtali í útvarpsþættinum Fótboltinu.net á X-inu FM 97,7 nú áðan. „Þetta var ekkert lengi að gerast sem er fínt, maður er í prófum og svona."

Fylkir féll niður í Inkasso-deildina eftir erfitt síðasta sumar, en Ragnar segir að síðasta tímabil hafi verið 11 á skalanum 1 upp í 10 hversu erfitt það var.

„Ég verð líklega að henda 11 á þetta. Þetta var rosalega pirrandi og sérstaklega að fara í gegnum þetta með uppeldisklúbbnum og klúbb sem maður var tilbúinn að gera allt fyrir."

Ragnar segir að það hafi að sjálfsögðu komið til greina að vera áfram og hjálpa Fylki í Inkasso-deildinni, en hugurinn var samt alltaf í Pepsi-deildinni.

„Það kom auðvitað til greina að vera áfram og taka slaginn, en hugurinn er bara að vera í Pepsi-deildinni og gera eitthvað meira úr því."

Hægt er að hlusta á viðtalið í heild sinni í spilaranum hér að ofan.