Valur sigraði Grindavík 4-2 í kvöld og tóku gullverðlaun í Lengjubikarnum 2018 í fjörugum leik.

Landsliðsmaðurinn Birkir Már Sævarsson spilaði allann leikinn í þriggja manna hafsentalínu Valsmanna. Birki fannst þeir hafa stjórn á leiknum og hafði litlar áhyggjur af því að vinna ekki í dag.

„Mér fannst við hafa þokkalega stjórn á þessu, þeir fengu smá kafla þarna og skoruðu mark sem var mjög vel gert hjá þeim og svo drápum við þetta eiginlega bara strax með að skora aftur."

Birkir er að spila í nýrri stöðu, hægra megin í þriggja manna hafsentalínu og lýst bara vel á þá stöðu þó hann fái ekki að keyra alveg jafn mikið upp og hann er vanur.

„Þetta er bara skemmtilegt, kannski aðeins minna sóknarlega en ég er vanur en maður venst öllu og við getum skipt yfir í 4-3-3 og þá spila ég í hægri bakverði og ekkert mál."

Birkir er eins og flestir vita á leið á HM með Íslenska landsliðinu og hefur verið byrjunarliðsmaður í liðinu í mörg ár. Hann kveðst vera alveg heill heilsu og tilbúinn í HM í Rússlandi.

„Ég er orðinn heill heilsu sem betur fer, er búinn að æfa vel í einhverja tvo mánuði og kominn í gott stand og það var fínt að fá landsleikinn sem ég fékk í mars til að sýna að ég er kominn í ágætis stand."