Kári liggur meiddur á vellinum í dag.
Heimir Hallgrímsson, annar af landsliðsþjálfurum Íslands, segir að Kári Árnason verði klár í slaginn gegn Tyrklandi á þriðjudag í lokaleik riðilsins í undankeppni EM.
Kári fór meiddur af velli á 18. mínútu gegn Lettum í dag eftir að hafa lent illa á bakinu. Sölvi Geir Ottesen kom inn á í hans stað.
„Hann verður með. Hann lendir bara í höndunum á Stefáni (Stefánssyni, sjúkraþjálfara), og hann reddar þessu. Kári fékk slink á bakið og fer í meðferð. Stefán segir að þetta verði ekki vandamál," sagði Heimir á fréttamannafundi í dag.
Jón Daði Böðvarsson verður líklega með gegn Tyrkjum en hann var ekki leikfær gegn Lettum í dag.
„Það var varkárni með Jón Daða að hann spilaði ekki í dag. Ég hugsa að hann verði klár. Þetta eru þannig meiðsli að þau skemma ekki fyrir framhaldið hjá honum. Við erum ekkert hræddir við að spila honum á móti Tyrkjum," sagði Heimir.
Athugasemdir
