Magnús Agnar Magnússon.
Magnús Agnar Magnússon, umboðsmaður hjá Total Football, býr í Hollandi og er í góðu sambandi við menn hjá félögum þar. Hollendingar voru kokhraustir fyrir leikinn gegn Íslendingum í gær og höfðu litlar áhyggjur. Það kom þó harkalega í bakið á þeim.
,,Ég vann nokkur veðmál við yfirmenn íþróttamála í Hollandi. Ég sendi sms fyrir leik og spurði hvort þeir væru búnir að undirbúa sig undir að tapa. Ég fékk þá spurningar um hvort ég væri á lyfjum og hvort ég væri fullur," sagði Magnús Agnar við Fótbolta.net í dag.
Magnús Agnar vann nokkrar rauðvínsflöskur í veðmálum um leikinn en Hollendingar voru meira segja til í að gefa honum flöskurnar ef Ísland myndi ná jafntefli. Íslenska liðið skellti Hollendingum hins vegar 2-0.
,,Ég sagði takk fyrir leikinn við þá eftir leik. Þeir sögðu þá. 'Það eru ekki eins og þið séuð komnir til Frakklands'. Ég svaraði þá bara: 'Við erum allavega nær því en þið," sagði Magnús Agnar léttur í bragði.
Síminn hefur varla stoppað hjá Magnúsi síðan í gærkvöldi en frammistaða íslensku leikmennina hefur vakið athygli víðsvegar í Evrópu.
,,Almennt er frammistaðan að vekja gríðarlega athygli. Góð frammstaða leikmanna sem eru að spila í lægri deildujm eins og Jón Daði, Theodór Elmar og Hannes Þór. Þeir áttu óaðfinnanlegan leik. Þeir hafa sýnt að þeir hafa getuna til að taka næsta skref."
Athugasemdir
