Kristján Flóki Finnbogason sóknarmaður FH hefur verið seldur til norska B-deildarliðsins Start. Þetta er tilkynnt á Twitter síðu FH nú rétt í þessu.
Hann hefur skrifað undir þriggja og hálfs árs samning við Start sem féll úr norsku úrvalsdeildinni á síðasta tímabili.
Hann hefur skrifað undir þriggja og hálfs árs samning við Start sem féll úr norsku úrvalsdeildinni á síðasta tímabili.
Kristján Flóki hefur skorað átta mörk fyrir FH í Pepsi-deildinni í sumar og tvö mörk í bikarkeppninni.
„Þetta er leikmaður sem hefur vakið athygli annarra liða á norðurlöndum. Við höfum lagt mikinn þunga í að fá hann og við erum því afar stolt af því að þetta hafi gengið í gegn og að hann sé orðinn leikmaður Start," sagði íþróttastjóri Start, Tor Kristian Karlsen og bætti við.
„Ég hef fylgst með þessum framherja í langan tíma og hann er svona dæmigerður framherji. Hann er sterkur í návígum, agressívur og góður skallamaður. Hann er líka ungur ennþá sem er gerir þetta enn betra fyrir okkur. Við sjáum möguleika fyrir hann að bæta sig."
Þessar fréttir hljóta að koma á mörgum á óvart en Kristján Flóki hefur lítið viljað tjá sig um þær fregnir að hann sé orðaður við lið erlendis frá.
Kristján Flóki var í viðtali við Elvar Geir Magnússon ritstjóra Fótbolta.net í vikunni sem átti að birtast í fyrramálið í aðdraganda leiks FH við Braga í undankeppni Evrópukeppninnar. Þar var hann spurður að því hvort hann hugsaði sér þann leik sem glugga fyrir sig í átt að atvinnumennsku.
„Nei ég pæli ekki í því. Ég pæli aðallega í því að standa mig vel fyrir FH-liðið og reyna að ná í bestu mögulegu úrslitin," var svar Flóka.
Nú er ljóst að þessi 22 ára sóknarmaður spilar ekki með FH gegn Braga á mporgun fimmtudag.
Start er í 2. sæti næst efstu deildar í Noregi með 35 stig, stigi á eftir Bodo/Glimt en Oliver Sigurjónsson gekk einmitt í raðir þeirra í félagaskiptaglugganum.
Athugasemdir