Lestu um leikinn: Stjarnan 1 -  2 Valur

Valskonur áttu harma að hefna en þær máttu sætta sig við tap gegn Stjörnunni í undanúrslitum bikarsins síðastliðinn sunnudag.

„Við vorum ákveðnar í að svara fyrir síðasta leik. Það er hundfúlt að vera dottnar úr bikar en við gerðum það sem við gátum til þess að gíra okkur upp í þennan leik og mér fannst það takast vel hjá liðinu.“

Elín Metta átti góðan leik og skoraði bæði mörk Vals. Það síðara úr vítaspyrnu sem andstæðingarnir voru ekki sáttir við og vildu meina að brotið hefði verið á Gemmu Fay markverði skömmu áður en að Kim Dolstra togaði Ariönu Calderon niður í teignum.

„Ég man ekki eftir neinu broti í aðdragandanum en mér fannst það sem hann dæmdi á vera pjúra víti,“ sagði Elín Metta en hún fór sallaróleg á vítapunktinn og skoraði.

Með sigrinum komast Valskonur í 25 stig og eru því aðeins tveimur stigum á eftir liðunum í 2.-4. sæti deildarinnar. Valskonur ætla að njóta þess að spila fótbolta út fótboltasumarið og sjá hvort það skili þeim ofar í töflunni.

„Við erum eiginlega svolítið pressulausar í þessum seinni hluta myndi ég segja. Við mætum náttúrulega í hvern leik til að vinna en við ætlum samt líka að njóta og reyna að hafa svolítið gaman af þessu. Mér fannst það takast í dag og við uppskárum. Við höldum því bara áfram,“ sagði Elín Metta meðal annars en nánar er rætt við hana í sjónvarpinu hér að ofan.