Mikill vindur setti svip sinn á leikinn en KA byrjaði að spila undan vindi og var þar af leiðandi talsvert meira í sókn í fyrri hálfleik án þess að skapa sér mörg færi. Það var á 37. mínútu eftir gott samspil að Anna Rakel Pétursdóttir náði að setja boltann fram hjá markverði Tindastóls/Hvatar og í netið. Anna Rakel var aftur nálægt því að skora rétt fyrir hálfleik en hornspyrna hennar hafnaði í fjær samskeytunum og út í teiginn. Margrét Árnadóttir bætti við öðru marki fyrir KA á 66. mín á þegar hún slapp ein á móti markverði Tindastóls/Hvatar.

Útlitið var því ekki bjart fyrir heimastúlkur sem höfðu barist vel en það var fjótt að breytast því einungis þremur mínútum síðar skoraði Nótt Þórunn með þrumuskoti eftir að hafa náð frákasti úr aukaspyrnu sem endaði í varnarvegg KA. Í uppbótartíma voru KA-stelpurnar tilbúnar að fara fagna á bekknum en þá átti Kolbrún Ósk draumaskot af hægri kantinum yfir markvörð KA og í fjærhornið. Staðan eftir venjulegan leiktíma var því 2-2.

Tindastóll/Hvöt fór því inn í framlenginguna með aukinn kraft og náðu þær að skora á móti vindi í fyrri hálfleik. Aftur var það Kolbrún Ósk á ferðinni sem fékk boltann hægra meginn í teignum og kláraði færið vel. Á nokkrum mínútum var því Tindastóll/Hvöt komnar úr vonlausri stöðu í vænlega stöðu. Á síðustu mínútu framlengingarinnar hélt dramantíkin áfram þegar leikmaður Tindastóls/Hvatar handlék knöttinn inn í eigin vítateig og gat Jan Eric góður dómari leiksins ekki gert annað en dæmt vítaspyrnu. Á punktinn steig Anna Rakel sem skoraði af öryggi.

Í vítaspyrnukeppninni þurfti níu víti á lið til að skera um hvort liðið færi með sigur af hólmi. Þar reyndist landsliðsmarkmaðurinn Harpa Jóhannsdóttir hetja KA-stúlkna en hún varði fjögur víti ásamt því að skora sjálf úr einu. KA-liðið fagnaði því vel í leikslok en þetta var kærkomið gull hjá mörgum stelpunum sem hafa þurft að sætta sig við silfur bæði í bikarkeppni í fyrra og á Íslandsmóti síðustu ár þrjú ár fyrir utan Íslandsmeistaratitil í B-liðum í ár.

Lið KA: Sara Mjöll Jóhannsdóttir (m) (Harpa Jóhannsdóttir (m), 41. mín), Dögg Rúnarsdóttir, Véný Skúladóttir (Karen Alfa Kolbeinsdóttir, 79. Mín), Ólöf Rún Pétursdóttir (Dagný Þóra Óskarsdóttir, 65. mín), Þórgunnur Þorsteinsdóttir (Kristín Brynjarsdóttir, 91. mín), Vaka Rán Þórisdóttir, Margrét Árnadóttir, Æsa Skúladóttir (f), Anna Rakel Pétursdóttir, Kristín Helga Auðunsdóttir og Karen Lind Arnardóttir.
Ónotaðir varamenn: Auður Ingvarsdóttir, Berglind Birta Kristinsdóttir og Diljá Dögg Trampe.
Þjálfarar: Egill Ármann Kristinsson og Björk Nóadóttir

Lið Tindastóls/Hvatar: Hrafnhildur S. Baldursdóttir (m) (Margret Rún Auðunsdóttir (m), 54. Mín), Jóna María Eiríksdóttir, Ásrún Jónatansdóttir, Vigdís Edda Friðriksdóttir (Alma Einarsdóttir, 65. mín), Nótt Þórunn Óttarsdóttir, Lafey Harpa Halldórsdóttir, Elín Sveinsdóttir, Kristrún María Magnúsdóttir, Kolbrún Ósk Hjaltadótttir (f), Kristrún Hilmarsdóttir (Elínborg Margrét Sigfúsdóttir, 57. mín) og Unnur Rún Sigurpálsdóttir (Hugrún Ása Gylfadóttir, 59. mín).
Ónotaðir varamenn: Karen Sól Káradóttir og Helga Sól Árnadóttir
Þjálfarar: Guðjón Örn Jóhannsson og Dúfa Dröfn Ásbjörnsdóttir