„Þetta er frábær tilfinning, ég er bæði mjög sáttur og mér finnst þetta líka verðskuldað," sagði Orri Sigurður Ómarsson varnarmaður Vals eftir að liðið tryggði sér Íslandsmeistaratitilinn í kvöld. Það gerðu þeir með því að vinna 4-1 sigur á Fjölni á Hlíðarenda. En var spennustigið í lagi þó þeir hafi vitað að þeir fengju titil með sigri í dag?
Lestu um leikinn: Valur 4 - 1 Fjölnir
„Já, mér fannst það. Auðvitað voru menn aðeins stressaðir ef það komu einhver mistök sem er eðlilegt en við erum búnir að fara í bikarúrslit tvö ár í röð og þekkjum alveg hvernig er að spila svona stórleiki. Við vorum ekkert á nálum."
Valur varð bikarmeistari undanfarin tvö ár og fyrir þau tímabil stefndi liðið aðeins að Evrópusæti í yfirlýstum markmiðum. Í ár virtust allir vita að það væri komið að Íslandsmeistaratitlinum því allir töluðu um hann.
„Þegar ég kom settist ég niður með Óla og stjórnarmönnum og við gerðum ákveðið þriggja ára plan. Það var vissulega mjög bjartsýnt, en við ætluðum að vinna þetta eftir þrjú ár. Bikarmeistaratitill hin árin var ákveðinn bónus en þetta var allt á plani. Fyrsta árið töldum við okkur ekki vera með hóp til að vinna en í fyrra töldum við okkur vera hóp til að vinna, og það gekk ekki. Því ákváðum við að fara á fullt í þetta núna og bættum við okkur mjög góðum mönnum."
Nánar er rætt við Orra í sjónvarpinu hér að ofan þar sem hann ræðir um tímabilið persónulega hjá sér og draumana um atvinnumennskuna.
Athugasemdir