Kante gekk til liðs við Chelsea sumarið 2016 eftir að hafa unnið ensku úrvalsdeildina mjög óvænt með Leicester. Hann gerði sér svo lítið fyrir og vann deildina annað árið í röð í fyrra, þá með Chelsea.

Kante hefur verið að standa sig vel á miðjunni hjá Chelsea á þessari leiktíð þrátt fyrir að liðið hafi ekki verið í sama formi og í fyrra.

„Ég er heima. Þetta er mitt félag," segir Kante sem er greinilega ekki á förum en hann hefur verið mikið orðaður við franska stórliðið Paris Saint-Germain upp á síðkastið.

„Þetta er mitt annað ár hjá Chelsea, við áttum gott tímabil í fyrra þegar við unnum ensku úrvalsdeildina og komumst í úrslit í bikarnum. Á þessu tímabili höfum við spilað í Meistaradeildinni, eitthvað sem ég hafði aldrei gert áður. Við ætlum að enda í topp fjórum og spila aftur í Meistaradeildinni á næsta tímabili."

Chelsea mætir Southampton í undanúrslitum FA-bikarsins en Kante segir að liðið verði að reyna að vinna þann bikar.

„Við erum líka enn í FA-bikarnum, það er góð keppni. Þetta er eini bikarinn sem við getum unnið á þessu tímabili svo við verðum að reyna allt til að vinna hann."