Freyr Alexandersson
„Ég er óánægður með að tapa, þetta var ekki leikur sem við þurftum að tapa, en við töpuðum og það er bara pirrandi. Það sem skiptir kannski meira máli er að þrátt fyrir að við höfum fengið fleiri færi og verið allavega ekki slakari aðilinn í leiknum, þá var frammistaðan okkar langt frá okkar besta," sagði Freyr Alexandersson, landsliðsþjálfari kvenna, eftir 1-0 tap gegn Dönum á æfingamóti í Kína í dag.
„Það er samt gott að vera hérna saman í nokkra daga og lært af þessu og ég held að við vitum alveg hvað það er sem við þurfum aðeins að spýta í með til þess að ná að spila betri leik en þetta."
Freyr segist þó geta tekið eitthvað jákvætt út úr þessum leik þrátt fyrir að frammistaðan hafi ekki verið upp á sitt besta.
„Já, ég geri það. Eins og ég segi þá erum við að spila á móti Dönum, sem eru með lið sem heldur boltanum vel og við vorum miklu meira en þær með boltann, við stjórnuðum leiknum og það hefur ekki gerst oft hjá okkur gegn Dönum."
Ísland á einn leik eftir á þessu æfingamóti, en hann er gegn Úsbekistan klukkan 08:00 á mánudaginn, um að gera að vakna snemma þar.
„Nú er bara að safna smá orku og aðeins að sjá hvernig leikmenn bregðast við tapinu, hvort við mætum ekki fersk á morgun og svo ennþá ferskari á leikdegi eftir tvo daga."
Viðtalið við Frey má sjá í spilaranum hér að ofan.
Athugasemdir
