Heimild: mbl.is
Eyþór Helgi Birgisson hefur komist að samkomulagi við 1.deildarlið Fram um riftun á samningi sínum við félagið. Frá þessu er greint á heimasíðu Morgunblaðsins í kvöld.
Þar segir Eyþór að hann skilji við Fram í góðu og hann leiti sér nú að nýju liði til að spila með næsta sumar.
Eyþór Helgi lék 13 leiki með Fram í fyrra og skoraði þrjú mörk en þessi 27 ára gamli framherji hefur einnig leikið með Víkingi Ólafsvík, HK, ÍBV og Ými á ferli sínum. Hann hefur skorað 45 mörk í 129 leikjum í deild og bikar.
Mikið hefur verið að gera í samningamálum Fram í dag því eins og við höfum greint frá samdi liðið við ítalska markvörðinn Stefano Layeni og gekk frá starfslokasamningi við króatíska varnarmanninn Mate Paponja.
Athugasemdir