Jóhann Berg Guðmundsson var ekki með þegar Ísland vann magnaðan 4-1 sigur á Ísrael á dögunum en verður vonandi klár þegar liðið mætir Úkraínu í úrslitaleik um sæti á EM á þriðjudaginn.
Albert Guðmundsson skoraði þrennu og átti stóran þátt í einu marki til viðbótar í leiknum. Jóhann Berg skoraði magnaða þrennu fyrir Ísland í 4-4 jafntefli gegn Sviss í undankeppni HM 2014.
Hvernig fannst þér þrennan hjá Alberti?
„Hún var mjög góð. Hún var ekki alveg jafn góð og mín," sagði Jói Berg léttur í bragði.
„Hann er auðvitað frábær leikmaður og er að spila frábærlega á Ítalíu og við vissum að við þurftum á hans styrkleikum að halda í svona leik og hann sýndi það. Hann er að stíga mjög mikið upp, ég er búinn að sjá mikla bætingu á hans leik, með og án bolta."
„Þetta kemur með reynslu, ég var oft svona, starandi á boltann og bíða eftir honum. Þetta er bara meiri reynsla og hann veit hvað það tekur að vinna fótboltaleik. Hann er búinn að hjálpa okkur mikið og sérstaklega í þessum leik," sagði Jói Berg að lokum.
Sjáðu þrennu Jóa Berg hér
Sjáðu þrennu Alberts hér
