Fótbolti.net náði tali af Jóhannesi Karli Sigursteinssyni þjálfara HK/Víkings en lið hans beið lægri hlut gegn Val í Borgunarbikarkeppninni fyrr í kvöld. Leikurinn fór 5-0 fyrir Pepsi-deildarliðinu en Jóhannes Karl gat engu síður tekið ýmislegt jákvætt út úr leiknum.
Lestu um leikinn: Valur 5 - 0 HK/Víkingur
„Við gerðum ákveðna hluti vel. Sérstaklega í fyrri hálfleik. Við getum legið til baka og reynt að halda stöðunn en við leysum það ekki jafn vel um leið og við þurfum að ýta upp völlinn þá opnast of mikið og færslurnar voru of hægar miðað við það tempó sem Valur spilar fótbolta á.“
„Við gerum ein mistök og Elín Metta refsar okkur fyrir það. Erum ekki að færa nægilega hratt og gefum henni tíma. Við vitum alveg að það má ekki,“ sagði Jóhannes Karl.
En fannst honum úrslitin gefa rétta mynd af leiknum?
„Þetta er náttúrulega bikarleikur. Hefðu einhver mörk skipt máli þá hefðum við ekki farið í þennan leikstíl. Við hefðum ekki opnað okkur svona mikið þannig að þetta gefur kannski rétta mynd af þessum leik sem bikarleik en það eru ekki fimm mörk á milli þessara liða.“
Þrátt fyrir tapið var Jóhannes Karl ánægður með að hafa fengið að mæta einu af bestu liðum landsins. Bæði til samanburðar við eigið lið og til að leikmenn HK/Víkings öðlist dýrmæta reynslu.
„Við viljum sjá hvar liðið stendur. Það skiptir okkur miklu máli að komast í 8-liða úrslitin og við vorum búin að óska eftir því að fá eitt af stóru liðunum og fá reynslu út úr því. Þetta er ómetanleg reynsla fyrir margar af þessum stelpum.“
Nánar er rætt við Jóhannes Karl í sjónarpinu hér að ofan.
Athugasemdir