Kanadíski vinstri bakvörðurinn Alphonso Davies verður líklegast seldur frá FC Bayern München í sumar þar sem hann neitar að skrifa undir nýjan samning við félagið.
Fótboltafréttamaðurinn Fabrizio Romano greinir frá því að Davies sé afar ólíklegur til þess að samþykkja samningstilboð Bayern á næstu vikum vegna mikillar óvissu innan félagsins.
Bayern hefur gefið Davies og umboðsmanni hans tvær vikur til að samþykkja samningstilboð félagsins, annars verði leikmaðurinn settur á sölulista.
Real Madrid er talið leiða kapphlaupið um Davies, sem er af mörgum talinn einn af bestu vinstri bakvörðum heims í dag. Hann er afar snöggur og teknískur leikmaður sem er einnig öflugur varnarlega.
Davies er aðeins 23 ára gamall en á nú þegar 184 leiki að baki fyrir Bayern. Hann hóf ferilinn með Vancouver Whitecaps í MLS deildinni og hefur skorað 15 mörk í 45 landsleikjum með Kanada, þar sem hann leikur yfirleitt úti á vinstri kanti.
Athugasemdir