Ejub Purisevic og lærisveinar hans í Víkingi Ólafsvík fóru tómhentir heim úr Kópavoginum í kvöld. Blikar komust í 2-0 í leiknum og Ólsarar minnkuðu muninn fyrir hálfleik. Gestirnir náðu þó ekki mikið að opna heimamenn í seinni hálfleiknum.
Lestu um leikinn: Breiðablik 2 - 1 Víkingur Ó.
„Mér fannst við byrja rosalega vel og það hefði verið sanngjarnt hefðum við náð að komast 1-0 yfir. Svo kemur tíu mínútna kafli þar sem við spilum einfaldlega illa. Við vorum ekki að pressa boltamann, vorum ekki að dekka vel og fengum tvö mörk í andlitið. Breiðablik hefur rosalega marga gæðaleikmenn og maður hugsaði: Hvar mun þetta enda?" segir Ejub.
„En við svöruðum þessu vel, minnkum muninn og vorum svolítið óheppnir að jafna ekki í fyrri hálfleik. Í seinni hálfleik vorum við allan tímann í leiknum en það vantaði aðeins meiri gæði og áræðni."
„Ég sagði við menn í klefanum að þessi tíu mínútna kafli, þetta væri ekki í boði."
Viðtalið má sjá í heild sinni í sjónvarpinu hér að ofan.
Athugasemdir