Lestu um leikinn: Stjarnan 1 -  3 Þór/KA

„En að sama skapi fannst mér við vera betri aðilinn í fyrri hálfleik. Engin spurning. Við héldum boltanum mjög vel, létum hann ganga flott og þær áttu fá svör við því fannst mér. Við fengum frábær mörk. Það er náttúrulega gríðarlega mikill karakter í þessu liði og um leið og markið kom hafði ég ekki miklar áhyggjur. Það var svo mikið eftir af leiknum og stelpurnar hafa sýnt það í sumar að þær eru fljótar að koma til baka.“

„Stelpurnar skora alltaf mark. Það þarf ekki að hafa áhyggjur af því. Spurningin er hve mörg hin liðin skora. Við lögðum náttúrulega gríðarlega mikla áherslu á varnarleikinn í síðari hálfleik. Við ákváðum að þétta raðirnar. Stjarnan er með frábært lið og frábæra sóknarmenn. Þær gátu bætt við tveimur A-klassa sóknarmönnum í lokin og þá var náttúrulega bara málið að loka þessu.“

Þór/KA jafnaði leikinn á 36. mínútu og það stefndi allt í að það yrði jafnt í hálfleik þegar Natalia Gomez skoraði með langskoti, nokkrum sekúndum fyrir hálfleiksflautið. Donni segir að markið hafi breytt nálgun liðsins í síðari hálfleik.

„Það breytti hálfleiksræðunni klárlega. Við fórum að tala meira um varnarþætti í hálfleiknum en sóknar eins og við hefðum gert. Við ætluðum alltaf að sækja sigurinn. Það kom aldrei til greina að vera að sækja jafntefli hérna. Markið breytti öllu. Við gátum slakað aðeins öðruvísi á og það var aðeins léttara andrúmsloft. Þetta var gríðarlega mikilvægt mark.“

„Þriðja markið drap þetta fannst mér. Mér fannst þær ekki ógna okkur mikið þrátt fyrir að vera komnar með margar fram og A-klassa menn inná. Þær ógnuðu markinu okkar ekki mikið held ég. Áttu skot í slá í lokin en annars var það nú ekki mikið og stelpurnar hentu sér fyrir það sem þurfti ef þurfti. Mér fannst þetta bara vinnu, karakterssigur. Virkilega fín gæði í fyrri hálfleik að mörgu leyti fyrir utan að skapa færi en svo í seinni hálfleik bara frábær karakter og vinnusemi sem skapaði þennan sigur. Það er bara flott.“

Þór/KA hefur byrjað mótið ótrúlega og er með fullt hús stiga eftir 7 umferðir. Einhverjar efasemdaraddir hafa heyrst um getu liðsins en þær hljóta að stoppa eftir umferðina. Það geta engar tilviljanir eða heppni orsakað svo öfluga byrjun og Donni ætlar sér að verða Íslandsmeistari.

„Ég vil meina og hef alltaf sagt að við ætlum að vinna alla leiki og við ætlum að verða Íslandsmeistarar. Það er algjör óþarfi að vera eitthvað feiminn við það. Þannig hugsa sigurvegarar. Þeir ætla bara að vinna allt og við ætlum að gera það. Sjáum hvað gerist en við stefnum alltaf á það.“

Framundan hjá Þór/KA er bikarleikur á laugardag og í kjölfarið tekur við tveggja vikna landsleikjafrí. Þór/KA ætlar að nýta fríið í hvíld eftir mikið álag á sömu leikmönnum.

„Við ætlum að hvíla okkur. Við höfum spilað mestmegnis á sama liðinu alla leikina. Ég er frábærlega ánægður með stöðugleikann með það. Einhverjir vilja segja að við höfum verið heppin en ég vil meina að við höfum unnið vel úr okkar spilum. Leikmennirnir eru bara í gríðarlega góðu líkamlegu ástandi og það hefur skapað góðan stöðugleika. En við ætlum að hvíla okkur. Það eru vissulega nokkrir þættir sem þarf að skerpa á og við notum tímann í það en að miklu leyti til ætlum við að hvíla okkur,“ sagði Donni meðal annars en nánar er rætt við hann í sjónvarpinu hér að ofan og þar kemur hann meðal annars inn á bikarleikinn gegn Blikum.