Rasmus þekkir eðlilega vel til danska boltans og hann gerir sér grein fyrir því að Valsmanna bíður verðugt verkefni.

„Bröndby er risaklúbbur en hefur kannski ekki gengið nógu vel undanfarin ár. Þeir eru með frábært lið og þetta verður hörkuleikur. Við eigum alveg séns í þá þó þeir séu betri á pappírunum en við."

„Það er erfitt að segja til um hverju við erum að fara að mæta. Þeir voru að fá nýjan þjálfara og eru að breyta leikstílnum sínum, Þeir munu líklega pressa hátt og taka svolítið fast á okkur. Við þurfum bara að vera tilbúnir að mæta því," segir Rasmus.

Nánar er rætt við Rasmus í spilaranum hér að ofan.

Leikur Vals og Bröndby hefst klukkan 21 í kvöld en liðin mættust í Evrópukeppni fyrir tíu árum síðan.

Þá fór fyrri leikurinn fram í Danmörku og lauk með 3-1 sigri Bröndby en Valsarar gerðu markalaust jafntefli við danska stórliðið í síðari leiknum. Í liði Vals þá voru tveir leikmenn sem nú standa í ströngu með íslenska landsliðinu á EM, bakverðirnir Birkir Már Sævarsson og Ari Freyr Skúlason.

Í liði Vals í einvíginu gegn Bröndby var annar maður sem slegið hefur í gegn á EM, knattspyrnulýsandinn Guðmundur Benediktsson.