„Við vorum ekki að skapa okkur mikið af færum í fyrri hálfleik en fáum að sama skapi engin færi á okkur heldur og það var gríðarlega mikilvægt fyrir okkur að leiða 1-0 í hálfleik.“

Harpa hefur verið hreint út sagt ótrúlega öflug í markaskorun í sumar og nýtti færin sín frábærlega í dag og skoraði þrjú fyrstu mörk Stjörnunnar.

„Það er frábært þegar hlutirnir ganga upp og það er verið að leggja upp góð færi og Kristrún átti náttúrulega einhverja draumabolta hérna í dag. Það er frábært að skora og frábært að geta lagt sitt af mörkum í svona leik. Tvímælalaust.“

2011 áhorfendur voru á vellinum í dag en það er áhorfendamet. Harpa segir það hafa verið frábært að spila fyrir framan allt þetta fólk.

„Það var geðveikt og þvílíkt lof til Selfyssinganna fyrir að mæta og gera daginn svona skemmtilegan og líka til okkar stuðningsmanna. Það var alveg frábært að spila leikinn við þessar aðstæður. Frábært veður og mjög vel að öllu staðið.“

Lið Stjörnunnar er í lykilstöðu í deildinni og Harpa segir að markmiðið sé að vinna tvöfalt.

„Framhaldið verður vonandi jákvætt fyrir okkur því við erum alveg með klár markmið fyrir þetta tímabil og við ætlum að vinna tvöfalt. Við gerum okkur samt alveg grein fyrir því að mótið er ekki búið þrátt fyrir að allir í kringum okkur séu að segja það og við þurfum að klára næstu tvo leiki til að gera okkur auðveldara fyrir. Við fögnum í dag og setjum hausinn svo aftur inn í Íslandsmótið,“ sagði þessi ótrúlega markamaskína meðal annars en hægt er að horfa á allt viðtalið við hana í sjónvarpinu hér fyrir ofan.