Byrjunarlið Víkings gegn Györ: Ögmundur byrjar sinn fyrsta leik - Endurkoma Daða Bergs eftir árs fjarveru

Aron Snær varð fyrir ökklameiðslum í leiknum gegn KA og er fjarverandi í leik kvöldsins. Ögmundur Kristinsson byrjar því sinn fyrsta leik fyrir Víking í hans fjarveru en hann kom einmitt inn á fyrir Aron gegn KA og fékk þar sínar fyrstu mínútur í treyju Víkings. Karl Friðleifur Gunnarsson kemur einnig inn í liðið en á bekkinn fer Davíð Örn Atlason sem byrjaði síðasta leik gegn KA. Daníel Hafsteinsson var að glíma við smávægileg meiðsli sem hann varð fyrir í 3-0 tapinu gegn Blikum í bikarnum og var hann því ekki í leikmannahópi Víkings gegn KA en hann snýr aftur í dag. Hann fer beint í byrjunarliðið og á bekkinn sest Tarik Ibrahimagic.

Það eru gleðifréttir fyrir Víkinga að á bekknum er Daði Berg Jónsson, sem spilaði síðast meistaraflokksleik 12. júlí á síðasta ári. Eins og flestir vita var hann á láni hjá Vestra á síðustu leiktíð og sló þar í gegn áður en hann var kallaður til baka í sumarglugganum en spilaði ekkert eftir það. Einnig er Róbert Orri Þorkelsson á bekknum í kvöld en hann hefur verið að glíma við meiðsli seinustu mánuði.

Einnig má sjá á leikmannahópi Györ að alsírski HM-farinn, Nadhir Benbouali, er ekki með en hann glímir við meiðsli. Hann skoraði eitt mark á HM og er besti leikmaður liðsins en á síðustu leiktíð skoraði hann 15 mörk og gerði fjórar stoðsendingar fyrir Györ.

Það eru því allir útileikmenn Víkings heilir og í hóp í kvöld að undanskildum Stíg Diljan Þórðarsyni sem er þó byrjaður að æfa aftur eftir nokkra mánaða meiðsli. Víkingar gætu varla verið á betri stað fyrir komandi Evrópuleiki og því tilvalið að byrja á sterkum heimasigri í kvöld.