Argentínski sóknarmaðurinn Paulo Dybala skoraði bæði mörk Roma í 2-0 sigrinum á Fiorentina í lokaleik Seríu A í kvöld.

Gestirnir spiluðu manni færri frá 24. mínútu er brasilíski bakvörðurinn Dodo fékk sitt annað gula spjald í leiknum.

Það var smá heppnisstimpill yfir fyrra mark Dybala. Tammy Abraham fann Dybala sem lét vaða við vítateigslínuna en boltinn fór af varnarmanni og í autt netið.

Roma náði að stjórna síðari hálfleiknum vel en liðið var í leit að öðru marki. Það kom á endanum og aftur var það samstarf Abraham og Dybala sem skilaði marki. Englendingurinn lagði boltann á Dybala sem tók skotið í fyrstu snertingu og inn fór boltinn.

Góður sigur Roma sem er í 7. sæti með 34 stig en Fiorentina er í 10. sæti með 23 stig.