Lucas Digne, varnarmaður Paris Saint-Germain og franska U21 landsliðsins, var ánægður með 4-3 sigurinn gegn Íslandi í undankeppni EM 2015 í kvöld.
Digne, sem var keyptur til PSG frá Lille fyrir 15 milljónir evra í sumar, segir að leikurinn hafi verið mjög erfiður.
„Við erum glaðirað hafa unnið, við komum hingað til að sækja sigurinn. Þetta var erfitt en við sýndum gott hugarfar gegn góðu liði Íslands,“ sagði Digne við Fótbolta.net.
,,Ísland er gott lið sem beitir skyndisóknum, þeir gerðu það í kvöld og sýndu hversu góðir þeir eru. Við vissum að þetta yrði flókið, að það væri kalt og þetta væri gott lið sem hafði unnið allt. Við bjuggumst við erfiðum leik,“ sagði Digne, sem þótti helst til kalt á Laugardalsvelli.
„Það var örlítið kalt, það er kaldara hérna en í Frakklandi,“ sagði hann léttur.
„Það er gott að hafa unnið alla leikina. Við munum gera okkar besta til að það haldi áfram. Við munum gera allt sem við getum til að efsta sætið verði okkar,“ sagði Digne.
Hann bætti því við að Ísland hefði verið erfiðasti andstæðingur Frakklands til þessa.
„Þetta er liðið sem hefur valdið okkur mestum vandræðum til þessa. Það er klárt að þetta er gott lið,“ sagði Digne að lokum.
Viðtalið má sjá hér að ofan, en það er að vísu á frönsku.
Athugasemdir