„Ég hef haldið þessum sögum út af fyrir mig í langan tíma en ég held að í dag sé dagurinn sem ég ætla að deila nokkrum þeirra með ykkur. Það er rétt að fjölskylduerjur á að leysa innan fjölskyldunnar frekar en á almannafæri, en ég ætla að birta mínar hér svo aðrar fjölskyldur geti vonandi lært af okkar mistökum. Hafið líka í huga að ekkert af þessu snýst um peninga," skrifaði Adebayor efst í færslunni.

Adebayor taldi upp nokkur skipti þar sem hann hjálpaði fjölskyldunni sinni með því að gefa þeim húsnæði, bíla og peninga til að stofna fyrirtæki. Nema hvað að fjölskyldumeðlimirnir misnotuðu góðmennsku hans og hraunuðu svo yfir hann þegar hann ætlaði að skamma þau fyrir það. Það versta er þó það sem Emmanuel segir um bróður sinn, Kola Adebayor.

„Bróðir minn Kola Adebayor er búinn að búa í Þýskalandi í 25 ár. Hann hefur flogið heim fjórum sinnum og ég borgaði öll flugin. Ég borga allan skólakostnað barna hans og þegar ég var leikmaður Monaco kom hann til mín og bað um pening til að stofna fyrirtæki. Aðeins Guð veit hversu mikinn pening ég lét hann fá, en hvar er fyrirtækið hans í dag?

„Þegar bróðir okkar Peter lést sendi ég Kola mikinn pening svo hann gæti flogið heim. Hann kom ekki í jarðaförina og í dag er þessi sami bróðir að dreifa lygum um mig, segjandi að ég hafi verið viðriðinn dauða Peter. Hvernig? Þetta er sami bróðir og sagði lygasögur við The Sun til að græða pening á því.

„Þegar ég var í Monaco hélt ég að það væri gott að eiga fótboltafjölskyldu svo ég passaði upp á það að bróðir minn Rotimi kæmist inn í fótboltaskóla í Frakklandi. Eftir nokkra mánuði var bróðir minn búinn að stela 21 síma af samherjum sínum.

„Ég ætla ekki að segja neitt um bróðir minn Peter sem er ekki meðal vor í dag. Megi sál hans hvíla í friði. Ég var í Gana þegar ég fékk fregnir um að Peter væri alvarlega veikur. Ég keyrði eins hratt og ég gat til Tógó til að hitta hann og hjálpa. Þegar ég kom tók móðir mín á móti mér en sagði að ég gæti ekki séð bróðir minn og bað mig um pening til að leysa allt. Aðeins Guð veit hversu mikið ég gaf henni þennan dag, svo segir fólk að ég hafi ekki gert neitt til að bjarga bróður mínum.

„Ég reyndi að leysa fjölskylduerjurnar árið 2005 og þegar ég spurði um þeirra álit sögðu þau að ég ætti að gefa hverju þeirra hús og mánaðarlaun. Í dag er ég enn lifandi og fjölskyldan mín er þegar búin að deila öllum mínum peningum og eignum, ef ég skyldi deyja. Í hvert skipti sem ég reyni að hjálpa einhverjum sem þarf pening endar það svona.

„Tilgangurinn með þessum pistli er ekki að lítillækka fjölskyldu mína. Ég vil bara að aðrar afrískar fjölskyldur læri af þessu. Takk."

Adebayor skrifaði þó mikið, mikið meira um stórfurðulegu fjölskylduerjurnar sem má finna á Facebook síðu hans.