Ási Haralds á æfingu fyrir leikinn gegn Slóveníu.
Ásmundur Haraldsson aðstoðarþjálfari kvennalandsliðsins tók að sjálfsögðu þátt í reitaboltanum á æfingunni í Lendava í dag. Fyrir reitinn ræddi hann við Fótbolta.net um leikinn, gegn Slóveníu í undankeppni HM, sem fram fer á morgun.
„Við eigum mjög góðar minningar héðan," segir Ási og vitnar þar í 6-0 útisigur gegn Slóveníu árið 2015. Getum við unnið það stóran sigur á morgun?
„Nei ég held að við nálgumst þetta ekki þannig. Með hverju árinu sem líður verða allar þjóðir sem við spilum á móti betri í fótbolta. Bilið milli liðanna minnkar og við getum ekki búist við svona úrslitum á morgun."
Slóvenía hefur aðeins náð að sækja sín stig gegn Færeyjum og þetta er leikur sem Ísland á að vinna og verður að vinna í baráttunni um að komast á HM.
„Ef allt er í lagi hjá okkur, ef allir eru í standi og fókus til staðar þá er þetta leikur sem við eigum að vinna. Við gerum kröfu til okkar sjálfra að ná í þrjú stig."
Ásmundur segir að allir okkar leikmenn séu í standi og ekkert eigi að trufla hann og Frey Alexandersson í því að velja sitt sterkasta lið. Sjáðu viðtalið við hann í heild sinni í sjónvarpinu hér að ofan.
Athugasemdir
