Færeyska U17 ára karlalandsliðið tryggði sér í dag sæti í lokakeppni EM sem fram fer í Króatíu í maí.
Um það bil 50 þúsund manns búa í Færeyjum og mikið er fjallað um þetta magnaða afrek þar í landi en þetta er í fyrsta skipti sem fótboltalið frá Færeyjum kemst í úrslitakeppni EM.
Færeyingar unnu Slóvaka 2-1 í dag í lokaumferð í milliriðli og tryggðu um leið sætið í úrslitakeppninni. Færeyingar gerðu jafntefli við Kýpur á föstudag en þeir enduðu í 2. sæti í milliriðlinum með 4 stig. Írar unnu riðilinn með fullt hús stiga.
Ísland datt út í undankeppninni síðastliðið haust en liðið endaði í fjórða og neðsta sæti í riðli þar sem andstæðingarnir voru Ísrael, Pólland og Armenía.
Færeyingar fögnuðu ógurlega þegar flautað var til leikslok gegn Slóvakíu í dag eins og sjá má á myndbandinu hér að neðan.
Athugasemdir