Adam Ingi Benediktsson, markvörður Gautaborgar í Svíþjóð, gæti fengið traustið fyrir komandi leiktíð eftir að aðalmarkvörður liðsins sleit krossband.
Pontus Dahlberg hefur staðið á milli stanganna hjá liðinu síðustu tvö ár en hann snéri heim eftir að hafa spilað með Watford á Englandi.
Hinn 21 árs gamli Adam Ingi hefur verið honum til halds og trausts, en ekki verið að fá tækifæri.
Adam hefur komið við sögu í einum bikarleik á þessu ári en hann mun þó áfram fá verðuga samkeppni því Gautaborg hefur landað norska markverðinum Anders Kristiansen á láni frá Sarpsborg.
Kristiansen er hokinn af reynslu. Hann er 34 ára gamall og spilaði áður með Union Saint-Gilloise í Belgíu ásamt því að eiga fjölda leikja fyrir yngri landslið Noregs.
Það verður fróðlegt að sjá hvort Adam nái að hafa betur í samkeppninni við Kristiansen en Gautaborg mætir Djurgården í fyrstu umferð sænsku deildarinnar á mánudag.
Athugasemdir