„Það var mjög skemmtilegt að klára U21-landsliðið með Frakka en hápunkturinn er að eftir að ég kom í Blikaliðið hefur okkur tekist að halda hreinu í fyrri hálfleik í öllum leikjum."

Mikil og sterk liðsheild hefur einkennt Blikana sem geta með sigri í lokaumferðinni sett stigamet hjá félaginu.

„Undirbúningstímabilið var mjög gott fyrir okkur og við náðum að koma liðinu vel saman. Liðsheildin er gríðarlega sterk og hún hefur skapað okkur sigra. Við erum tilbúnir að fórna okkur fyrir hvor aðra og það gerir að verkum að við erum svona ofarlega þó við viljum auðvitað vera ofar," segir Oliver sem segir mikinn metnað hjá Blikum sem vilja gera enn betur á næsta ári.

„Það er metnaður í félaginu til að gera það. Kvennaliðið stóð sig frábærlega og er góð fyrirmynd. Við í karlaliðinu ætlum okkur að reyna að gera betur en í sumar. Það mega náttúrulega margir fara en þá þurfa nýir að koma inn. Það er ekki í mínum höndum en við ætlum okkur að koma enn graðari til leiks næsta tímabil."

Búast má við að einhver erlend félagslið séu með nafn Olivers á blaði hjá sér. Verður hann áfram í Blikum næsta sumar?

„Ég ætla ekki að lofa neinu. Mér líður rosalega vel á Íslandi og ég er aðeins í viðræðum við Breiðablik núna. Ég ætla að setjast niður með mínum umboðsmanni og tala við hann eftir tímabilið. Ég er rosalega spenntur fyrir því að vera áfram á Íslandi og ég vill verða enn betri í fótbolta. Þetta kemur í ljós."

Aldursforseti Breiðabliks er Gunnleifur Gunnleifsson markvörður sem er í úrvalsliði ársins.

„Það er eiginlega ekki hægt að lýsa því hve mikilvægt er að hafa hann. Hann er ekki bara með reynslu heldur líka með þvílík gæði. Liðið hefur verið þétt í sumar en þegar eitthvað hefur komist í gegn hefur hann alltaf verið tilbúinn að verja. Utan vallar drífur hann menn áfram og þar er hann ekki síður mikilvægur," segir Oliver.

Kópacabana, stuðningssveit Breiðabliks, hefur staðið sig vel í sumar og á sérstakt lag með Oliver. Þrátt fyrir tilraun var ekki hægt að fá Oliver til að syngja lagið fyrir lesendur Fótbolta.net.

„Ég er búinn með minn söngferil og hann verður ekki tekinn aftur upp. Söngvaborg var toppurinn á mínum söngferli og það verður ekki leikið aftur eftir."

Sjá einnig:
Aron Elís Þrándarson efnilegastur 2014
Hólmbert Friðjónsson efnilegastur 2013