Úrvalslið vikunnar í enska 2 - Suarez stjarna sýningarinnar

Við hefjum leik á Craven Cottage þar sem Hugo Lloris átti frábæran leik í marki Tottenham þegar liðið vann Fulham. Í hægri bakverðinum er Brasilíumaðurinn Rafael sem kom aftur í byrjunarlið Manchester United og stóð sig vel gegn Everton þó Englandsmeistararnir hafi beðið lægri hlut.

Við höldum okkur á Old Trafford. Bryan Oviedo er í vinstri bakverðinum en hann hefur staðið sig frábærlega í að fylla skarð Leighton Baines sem er á meiðslalistanum hjá Everton. Oviedo skoraði sigurmarkið gegn United seint í leiknum.

Í hjarta varnarinnar er Phil Jagielka, annar leikmaður Everton, en hann var sem klettur í öftustu línu. Ben Turner hjá Cardiff var í stuði þegar lið hans gerði jafntefli við Stoke.

Eden Hazard er að sjálfsögðu í úrvalsliðinu eftir að hafa skorað tvö mörk og lagt upp í 4-3 sigri Chelsea gegn Sunderland. Baráttan um sæti á miðjunnni var hörð en eftir sigur Arsenal á Hull eru þar Santi Cazorla og Mesut Özil.

Yaya Toure skoraði tvívegis í sigri Manchester City á West Brom og er í liðinu. Fremstu menn eru svo Romelu Lukaku sem fór illa með Nemanja Vidic á Old Trafford og Luis Suarez sem er stjarna sýningarinnar eftir að hafa skorað fjögur mörk í 5-1 sigri gegn Norwich.

Sjá einnig:
Fyrri úrvalslið í enska