Úrvalslið vikunnar í enska - Tveir frá Man Utd

David de Gea er í markinu eftir hetjulega frammistöðu í sigri United. Spánverjinn vann stigin þrjú fyrir Rauðu djöflanna. Í blálok fyrri hálfleiks varði hann vítaspyrnu og í uppbótartíma leiksins átti hann tvær stórbrotnar vörslur.

Cesar Azpilicueta og Gary Cahill voru frábærir í vörn Chelsea. Vincent Kompany bankaði á dyr úrvalsliðsins en liðsfélagi hans hjá City, Eliaquim Mangala, tók sætið í þriggja manna vörn.

Cesc Fabregas heldur áfram að sýna gæði sín með Chelsea en það hlýtur að hafa verið sársaukafullt fyrir stuðningsmenn Arsenal að sjá hann í bláa búningnum um helgina. Angel Di Maria skoraði og lagði upp í sigri United og er kominn í uppáhald stuðningsmanna á Old Trafford.

Þá er Jordan Henderson á miðjunni en hann fékk verðskuldað hrós eftir sigur Liverpool á West Brom. Loksins er Yaya Toure farinn að vera líkur sjálfum sér en hann skoraði frábært mark fyrir City.

Í sóknarlínunni er svo Adam Lallana hjá Liverpool sem skoraði um helgina. Loksins loksins! Lallana hefur ekki sýnt mikið hjá Liverpool en kannski er þetta merki um það sem koma skal. Sergio Aguero var síógnandi hjá City og Steven Fletcher skoraði og bjó til mark fyrir Sunderland gegn Stoke.

Sjá einnig:
Fyrri úrvalslið í enska boltanum