Lengjudeildin: Kári refsaði Grindvíkingum - Gerði sigurmark í fyrsta leiknum í tvö ár

Fyrri hálfleikurinn hjá Grindavík og Fylki var bragðdaufur. Fylkismenn byrjuðu betur en Grindvíkingar unnu sig inn í leikinn eftir því sem leið á hálfleikinn.

Það var ekki mikið um dýrðir fyrir hlé, en í þeim síðari voru Grindvíkingar sterkari og líklegri til að taka öll stigin.

Heiðar Snær Ragnarsson vildi fá vítaspyrnu þegar um hálftími var eftir er hann fór upp í skallabolta. Ólafur Kristófer Helgason, markvörður Fylkis, fór einnig í boltann og endaði svo í Heiðari. Ekkert var dæmt.

Grindvíkingar fengu nokkur góð færi til að komast yfir en nýttu þau ekki. Þeim var refsað þegar Kári Sigfússon skoraði sigurmarkið eftir sofandahátt í vörn heimamanna.

Fylkir hafði lítið sem ekkert ógnað marki Grindavíkur en nýtti sitt augnablik og fór með sigurinn gegn gangi leiksins.

Ekki var það fallegt, en það dugði Fylki til að taka öll stigin og komast upp í 2. sæti deildarinnar með 18 stig. Grindavík er í 10. sæti með 7 stig.

Endurkoma Ívars skilaði sigrinum

ÍR-ingar unnu flottan 2-1 sigur á Gróttu á Þarfaþingsvelli í Breiðholti.

Það var líf og fjör í fyrri hálfleiknum en engin mörk, þótt ótrúlegt megi virðast.

Andri Freyr Jónasson kom sér í dauðafæri en setti boltann beint á Vilhelm í markinu. Dagur Bjarkason átti skalla í þverslá og Emil Nói Sigurhjartarson skot í slá hinum megin á vellinum.

Andri kom sér í annað dauðafæri undir lok hálfleiksins en setti boltann yfir markið.

Þetta var ekki alveg dagurinn hans Andra. Snemma í síðari hálfleik átti hann tilraun sem hafnaði í stönginni eftir undirbúning Tristans Freys Ingólfssonar.

Fyrsta markið kom sjö mínútum síðar og það voru ÍR-ingar sem gerðu það. Bergvin Fannar Helgason kom boltanum á Víði Frey Ívarsson sem skoraði.

Gróttumenn jöfnuðu aðeins fjórtán mínútum síðar þegar Einar Tómas Sveinbjarnarson skoraði með skoti eftir hornspyrnu.

Á 81. mínútu kom Ívar Óli Santos inn á í sínum fyrsta leik í tvö ár og tryggði ÍR-ingum sigurinn fjórum mínútum síðar, og það gegn sínum gömlu félögum. Hann fékk dauðafæri til að gera annað mark sitt undir lokin en setti boltann yfir.

Alvöru innkoma hjá Ívari, sem reyndist hetja ÍR-inga. ÍR er í 9. sæti með 10 stig á meðan Grótta er í 7. sæti með 12 stig.

ÍR 2 - 1 Grótta
1-0 Víðir Freyr Ívarsson ('54 )
1-1 Einar Tómas Sveinbjarnarson ('68 )
2-1 Ívan Óli Santos ('85 )
Lestu um leikinn

Grindavík 0 - 1 Fylkir
0-1 Kári Sigfússon ('81 )
Lestu um leikinn