Howe hefur verið sterklega orðaður við þjálfarastarfið hjá enska landsliðinu eftir að Gareth Southgate sagði upp eftir tap í úrslitaleik annað Evrópumótið í röð.

„Ég starfa fyrir ótrúlegt fótboltafélag og ég er virkilega stoltur af því að vera þjálfarinn hérna," sagði Howe við BBC úti í Þýskalandi þar sem Newcastle er statt í æfingaferð um þessar mundir.

„Ég elska stuðningsfólkið, leikmennina og starfsfólkið hérna. Ég hef engan áhuga á því að yfirgefa þennan stað svo lengi sem ég er ánægður og mér líður eins og ég hafi stuðning. Ég er hamingjusamur í Newcastle."

Howe hefur verið við stjórnvölinn hjá Newcastle í tvö og hálft ár og er talinn eiga tvö eða þrjú ár eftir af samningnum við félagið, en það ríkir mikil leynd yfir samningslengdinni.