Spænski miðjumaðurinn Chema Andres gekk í raðir Brighton frá Stuttgart en þessum 21 árs leikmanni hefur verið líkt við Rodri, fyrirliða heimsmeistara Spánar.

„Ég skil samlíkinguna við Rodri. Þegar maður horfir á hvernig hann leikmaður hann er og hvernig hann hreyfir sig þá eru alveg líkindi. En Rodri er einn besti leikmaður heims svo það er löng vegferð framundan fyrir Andres en við munum reyna að hjálpa honum á henni," segir Fabian Hurzeler, stjóri Brighton.

„Þessi strákur er frábær karakter og hann vill bæta sig á hverjum degi. Hann kom hingað og vildi strax fara út á völl og æfa sig með boltann. Maður sér það strax að hann hefur mikinn metnað. Hann vill afreka hluti."

„Ég skil líkinguna við Rodri en það er mikið verk óunnið og vonandi kemst hann þangað einn daginn. Það yrði stórt fyrir okkur og einnig fyrir fótboltann í heild sinni!"

Fabian Hurzeler, stjóri Brighton, segir að draumur Yankuba Minteh geti orðið að veruleika í framtíðinni eftir að félagið hafnaði tilboðum Liverpool í lok félagaskiptagluggans.

Liverpool gerði 60 milljóna punda tilboð í þennan 22 ára gambíska kantmann en samkvæmt BBC vildi Brighton fá nálægt 70 milljónum.

Minteh, sem kom frá Newcastle fyrir 30 milljónir punda árið 2024, spilar aðallega á hægri vængnum og hefur skorað 10 mörk og lagt upp 9 í 73 leikjum fyrir mávana.

„Ef allt liðið nær árangri og Yankuba lætur ljós sitt skína þá mun hann fá mikla athygli aftur og hann getur þá kannski uppfyllt draum sinn í næsta félagaskiptaglugga," segir Hurzeler.

„Hann hefur verið með okkur í tvö ár núna og áorkað miklu með strákunum. Þetta snýst líka um að hann skuldbindi sig núna og haldi áfram að leggja sig fram fyrir félagið. Við viljum ná árangri sem lið og þá getum við skinið sem einstaklingar. Ef við náum árangri saman mun athyglin beinast að einstökum leikmönnum, það sýnir sagan."

Velski miðvörðurinn Joe Rodon fór meiddur af velli þegar Leeds gerði 1-1 jafntefli gegn Brentford í annarri umferð ensku úrvalsdeildarinnar.

„Það eru því miður slæmar fréttir varðandi meiðsli Rodon, alvarleg meiðsli á aftan í læri. Hann verður frá í átta til tíu vikur. Hann mun örugglega ekki spila fyrstu leikina eftir landsleikjagluggann," segir Daniel Farke, stjóri Leeds.

„Þetta er mikið áfall fyrir okkur því hann er lykilmaður fyrir okkur. En svona er fótboltinn og stundum þarf maður að glíma við meiðsli. Hann mun örugglega missa af næstu átta til tíu vikunum líklega.“

Leeds er með fjögur stig að loknum fyrstu tveimur umferðum ensku úrvalsdeildarinnar en liðið mætir Brighton á laugardag.