Fótbolti.net ræddi við Börk Edvarsson, formann Vals, um komu Gylfa. Börkur var spurður út í vangavelturnar. Er hann sammála því að vanti djúpan miðjumann? Er verið að skoða frekari liðsstyrk?

„Við erum eðli málsins samkvæmt alltaf að skoða leikmannamarkaðinn og það er haldið að okkur leikmönnum alla daga, sent og hringt og allt það - og leikmenn bjóða sig sjálfir. Við erum alltaf að skoða en við erum með frábærlega vel samansettan hóp og góða leikmenn og mikla reynslu í hópnum okkar í bland við unga leikmenn. Við erum með leikmenn sem geta leyst 'sexu' hlutverkið með bravör. En í öllum góðum fótboltaliðum, sama á hvaða getustigi það er og í hvaða deild, vantar ekki alltaf 1-2?" sagði Börkur.

Guðmundur Þórarinsson, leikmaður OFI Crete og íslenska landsliðsins, hefur verið orðaður við Val. Er eitthvað til í þeim sögum? Hafa Valsmenn verið í sambandi við hann?

„Nei, það er ekkert til í þeim sögum. Hann er í sínu liði í Grikklandi og gengur vel, en við vitum alveg af honum, fylgjumst vel með honum og þekkjum til hans. Hann er frábær fótboltamaður og það er gleði- og fagnaðarefni ef hann kæmi til Íslands, en ég veit ekkert um það. Tíminn verður að leiða það í ljós," sagði Börkur.

Samningur Gumma við OFI rennur út í sumar.