Víkingur Ólafsvík og Árbær áttust við í síðasta leik dagsins í B-deild karla í Lengjubikarnum og úr varð spennandi slagur.

Árbæingar tóku forystuna í fyrri hálfleik en Ólsarar snéru taflinu við fyrir leikhlé og leiddu 2-1.

Luke Williams skoraði tvennu fyrir heimamenn í Ólafsvík sem voru komnir með þriggja marka forystu á 73. mínútu.

Jordan Chase Tyler minnkaði muninn aftur niður í tvö mörk fyrir Árbæ en þar við sat og urðu lokatölur 4-2.

Víkingur fer uppfyrir Árbæ í toppbaráttu riðilsins með þessum sigri. Ólsarar eru þar í öðru sæti með átta stig á meðan Árbær situr eftir í þriðja sæti með sex stig fyrir lokaumferðina.