Athletic Bilbao er komið upp í fjórða sæti spænsku deildarinnar eftir sigur gegn Alavés í lokaleik kvöldsins.

Fyrri hálfleikurinn var afar fjörugur, þar sem Luis Rioja klúðraði vítaspyrnu á 31. mínútu en heimamenn í Bilbao geystust í sókn í kjölfarið og tóku forystuna.

Gorka Guruzeta skoraði fyrir Athletic eftir undirbúning frá Nico Williams og tvöfaldaði Guruzeta svo forystuna sjálfur með öðru marki fimm mínútum síðar.

Athletic var sterkara liðið í kvöld og verðskuldaði tveggja marka sigur sem fleytir liðinu uppfyrir Atlético Madrid í baráttunni um síðasta meistaradeildarsætið.

Atlético fær tækifæri til að endurheimta fjórða sætið þegar liðið tekur á móti Barcelona í risaslag annað kvöld.