Julian Nagelsmann, landsliðsþjálfari Þýskalands, er sagður vera búinn að ákveða það að Manuel Neuer verði aðalmarkvörður Þjóðverja á Evrópumótinu í sumar.
Neuer er í baráttu við Marc-André ter Stegen, markvörð Barcelona, um stöðuna.
SportBuzzer í Þýskalandi segir frá því að Nagelsmann hafi fundað með báðum markvörðum og tekið ákvörðun eftir það.
Hinn 37 ára gamli Neuer mun snúa aftur í þýska hópinn núna í þessum mánuði í fyrsta sinn síðan liðið féll úr leik á HM í Katar 2022. Hann hefur verið að glíma við meiðsli en er núna klár í slaginn.
Ter Stegen leysti Neuer af hólmi en hann hefur sjálfur verið að glíma við meiðsli að undanförnu.
Þýskaland er á heimavelli í sumar og það er víst Neuer sem mun fá ábyrgðina í markinu.
Athugasemdir