Ítalía vann Ekvador, 2-0, er þjóðirnar áttust við í vináttuleik í New York í Bandaríkjunum í kvöld.

Lorenzo Pellegrini, leikmaður Roma, kom Ítölum á bragðið á 3. mínútu með stórkostlegu skoti fyrir utan teig. Federico Dimarco tók aukaspyrnu í vegginn og til Pellegrini sem hamraði honum efst í hægra hornið.

Inter-maðurinn Nicolo Barella skoraði síðan annað markið í uppbótartíma síðari hálfleiks eftir frábæra skyndisókn. Riccardo Orsolini átti laglega sendingu inn fyrir á Barella sem vippaði boltanum yfir markvörð Ekvador og í netið.

Landsliðsverkefni Ítalíu er þar með lokið en þjóðin vann báða vináttuleiki sína. Ítalir unnu einnig Venesúela, 2-1, þar sem Mateo Retegui, samherji Alberts Guðmundssonar, gerði bæði mörkin.