Turpin er með fremstu dómurum heims. Hann dæmdi úrslitaleik Meistaradeildar Evrópu árið 2022 er Real Madrid og Liverpool mættust og þá hefur hann dæmt á fjölda stórmóta.

Frakkinn dæmdi meðal annars í 1-1 jafntefli í undankeppni HM árið 2016.

Elvar Geir Magnússon og Sæbjörn Steinke, ritstjórar Fótbolta.net, eru ánægðir með að tvífari Arsenal-mannsins, Leandro Trossard, verði á flautunni í leiknum.

„Maðurinn sem dæmdi þennan leik 2016 er að fara dæma aftur viðureign þessara liða á þriðjudaginn. Tvífari Leandro Trossard, þeir eru alveg eins. Það er hægt að finna myndir þar sem hann er að spjalla við Trossard og þeir er eins og tvíburabræður að spjalla saman á vellinum.“

„Hann er búinn að vera dæma lengi í hópi bestu dómara heims. Búinn að dæma á síðustu tveimur heimsmeistaramótum og Evrópumótum og dæmdi úrslitaleik Real Madrid og Liverpool í Meistaradeildinni á Stade De France.“

„Hann dæmdi reyndar víti á Ísland í þessum leik gegn Úkraínu. Það var Arnór Ingvi sem var brotlegur, en hann skaut í stöngina. Konoplyanka skaut í stöngina, en það var ekki það að við vorum góðir í þessum leik heldur féll allt með okkur,“ sagði Elvar Geir.

Ástríðu-dómarinn Tómas Meyer er sérstaklega ánægður og fær hann sérstaka gæðavottun frá honum. Tómas hefur verið einn allra besti neðrideildar dómari síðustu árin, en Turpin er í miklu uppáhaldi hjá honum.

„Ég er ánægður með þetta val. Tómas Meyer tjáði sig á samfélagsmiðlum, okkar maður, hann fagnaði þessu og sagði að Clément Turpin væri í miklu uppáhaldi. Þannig hann er með gæðavottun frá Meyernum,“ sagði Elvar enn fremur.