Albert Guðmundsson er að sjálfsögðu í byrjunarliði hollenska liðsins AZ Alkmaar sem mætir spænska liðinu Real Sociedad á útivelli í Evrópudeildinni klukkan 17:55.

Samkvæmt heimasíðu UEFA er hann að spila á hægri vængnum í leiknum í kvöld.

Albert hefur raðað inn mörkum í síðustu leikjum og skoraði tvö mörk í 4-1 sigri AZ gegn króatíska liðinu Rijeka í síðustu viku.

Þá er hann með þrjú mörk í tveimur síðustu leikjum í hollensku deildinni en hann skoraði tvö mörk gegn Waalwijk í 3-0 sigri um síðustu helgi.

AZ hefur unnið báða leiki sína í F-riðli Evrópudeildarinnar en Real Sociedad er með þrjú stig. Napoli er í sama riðli með þrjú stig en Rijeka er stigalaust.

Real Sociedad: Moyà, Gorosabel, Elustondo, Le Normand, Monreal, Portu, Guevara, Merino, David Silva, Oyarzabal, Isak.

AZ: Bizot, Svensson, Hatzidiakos, Koopermeiners, Wijndal, Midtsjø, De Wit, Albert Guðmundsson, Stengs, Karlsson, Boadu.