Eftirminnileg augnablik Ronaldo og Íslands - „Þeir munu aldrei vinna neitt“

Lék sinn 200. landsleik á Laugardalsvelli
Ronaldo afrekaði það á Laugardalsvelli í júní 2023 að verða sá fyrsti til að leika 200. landsleiki. Vanda Sigurgeirsdóttir, þáverandi formaður KSÍ, afhenti þeim portúgalska blómvönd fyrir leik.

Ronaldo skoraði sigurmark leiksins undir lokin og tók sitt fræga 'Sui' fagn.

Vildi fá fréttamann Fótbolta.net til Al Nassr
Í aðdraganda 200. landsleiksins mætti Ronaldo á blaðamannafund á Laugardalsvelli. Sæbjörn Þór Steinke, fréttamaður Fótbolta.net, spurði Ronaldo af öllum leikmönnum heims hvern myndi hann vilja fá til Al Nassr.

Hann hugsaði sig um í nokkrar sekúndur og benti síðan á Sæbjörn og sagði: „You," og uppskar mikinn hlátur úr salnum.

TENGT EFNI19.06.23 - 18:41

Myndband: Ronaldo grínaðist við fréttamann Fótbolta.net

Sár eftir jafnteflið á EM
Ronaldo var afar ósáttur eftir 1-1 jafntefli við Ísland á EM í Frakklandi 2016 og vandaði íslenska liðinu ekki kveðjuna eftir leik.

„Þeir fögnuðu eins og þeir hefðu unnið Evrópumótið. Það er hugsunarháttur þess litla. Þess vegna munu þeir aldrei vinna neitt," sagði Ronaldo á blaðamannafundi eftir leik.

Nokkrum dögum eftir leikinn bætti Ronaldo um betur og kastaði hann míkrafóni erlends fréttamanns í vatn eftir að hann spurði hann út í hvort portúgalska landsliðið væri tilbúið í næsta leik.

TENGT EFNI14.06.16 - 22:24

Ronaldo: Ísland mun aldrei vinna neitt

Aron fékk ekki treyjuna
Eftir jafnteflið gegn Íslandi á EM tók Ronaldo ekki í hendur á leikmönnum íslenska liðsins og reyndi Aron Einar Gunnarsson að fá treyju stórstjörnunnar eftir leik án árangurs.

Í kjölfarið fór í gang herferð á samfélagsmiðlum undir merkinu „Shirts for Aron" þar sem hresst fólk fór að bjóða Aroni Einari treyjur. Íslenska liðið gaf Aroni síðan Ronaldo treyju í sárabótagjöf.

Skoraði í fyrstu heimsókninni á Laugardalsvöll
Ronaldo heimsótti Laugardalsvöll í fyrsta sinn árið 2010, í undankeppni EM, og þar vann Portúgal 3-1 sigur.

Hann skoraði þar beint úr aukaspyrnu framhjá Gunnleifi Gunnleifssyni markverði Íslands en hin mörk portúgalska liðsins gerðu Raúl Meireles og Helder Postiga. Heiðar Helguson skoraði mark Íslands.