Lingard fékk yfir sig fúkyrðaflaum

Jesse Lingard, leikmaður Manchester United, fékk yfir sig ljót orð þegar hann gekk um borð í liðsrútu United eftir 3-0 bikarsigurinn gegn Derby í gær.

Fólk hafði safnast saman við rútuna og var ljótum orðum kallað að Lingard. Einn úr hópnum er sakaður um að hafa verið með kynþáttaníð.

<i>Daily Mail</i> talar um að stuðningsmenn United hafi verið að hrópa að Lingard en ekki er vitað hvort allir í hópnum hafi verið United stuðningsmenn og hversu margir hafi verið með fúkyrðin.

Bakvörðurinn Luke Shaw sést á myndbandi vera að koma liðsfélaga sínum til varnar og svara stuðningsmönnunum.

Lingard hefur ekki staðið undir væntingum og náði ekki að skora eða leggja upp eitt einasta mark á síðasta ári.