HB Köge á blússandi siglingu - Fiorentina vann

Emelía lék fyrstu 84 mínúturnar og er Köge með sjö stiga forystu á toppi dönsku deildarinnar eftir sigurinn.

Katla Tryggvadóttir og Íris Ómarsdóttir voru þá saman í byrjunarliði Fiorentina sem hafði betur gegn Lazio í efstu deild á Ítalíu. Íslendingaliðið er í þriðja sæti, með 13 stig eftir 7 umferðir.

Á sama tíma tapaði Parma gegn Roma í ótrúlegum ellefu marka leik. Birta Georgsdóttir sat á bekknum hjá Parma, sem náði forystunni fjórum sinnum í leiknum en tapaði að lokum.

Parma er í fallbaráttu með 5 stig eftir 7 umferðir á meðan Rómverjar eru með fullt hús stiga.

Í þýsku titilbaráttunni sat Glódís Perla Viggósdóttir allan tímann á bekknum í þægilegum sigri hjá FC Bayern á útivelli gegn Wolfsburg.

Glódís er fyrirliði Bayern en hefur ekki komið við sögu síðan í lok október vegna hnémeiðsla. Bayern er með fullt hús stiga eftir tíu umferðir af deildartímabilinu - með sex stiga forystu á Wolfsburg sem situr í öðru sæti.

Í næstefstu deild í Svíþjóð lék Eyrún Embla Hjartardóttir allan leikinn er varalið Häcken tapaði heimaleik. B-lið Häcken er þegar fallið úr deildinni, með 9 stig eftir 26 umferðir.

Að lokum skoraði Cloé Lacasse eina mark Utah Royals í tapi gegn Washington Spirit í Bandaríkjunum.

Odense 1 - 4 HB Köge

Fiorentina 2 - 1 Lazio

Roma 6 - 5 Parma

Wolfsburg 1 - 4 Bayern

Hacken B 1 - 3 Örebro

Washington Spirit 2 - 1 Utah Royals