Ítalía: Þrjú rauð spjöld í sigri Inter í toppslag

Inter náði þriggja stiga forystu á toppnum í ítölsku deildinni þegar liðið vann Atalanta í fjörugum leik.

Staðan var markalaus í hálfleik en Carlos Augusto kom Inter yfir snemma í seinni hálfleik þegar hann skoraði með skalla eftir hornspyrnu.

Þegar tæpar tíu mínútur voru til loka venjulegs leiktíma fékk Ederson, miðjumaður Atalanta, rautt spjald. Honum fannst vera brotið á sér og fékk gult spjald fyrir kjaftbrúk. Hann klappaði fyrir dómaranum í kjölfarið og fékk annað gult spjald og þar með rautt.

Lautaro Martinez bætti öðru markinu við fyrir Inter og stuttu síðar fékk Gian Piero Gasperini, stjóri Atalanta, rautt spjald fyriri kjaftbrúk.

Dómari leiksins var ekki hættur að lyfta síðasta rauða spjaldinu upp. Í uppbótatíma fékk Alessandro Bastoni rautt spjald fyrir brot á Daniel Maldini.

Inter er á toppnum með 64 stig, þremur stigum á undan Napoli sem gerði óvænt jafntefli gegn Venezia í dag. Atalanta er í 3. sæti með 58 stig.