Robert Lewandowski mætti aftur á Allianz Arena þegar Barcelona heimsótti FC Bayern í riðlakeppni Meistaradeildarinnar í vikunni.
Bayern vann leikinn 2-0 en Börsungar fengu urmul tækifæra til að skora og klúðraði Lewandowski nokkrum dauðafærum gegn sínum fyrrum liðsfélögum.
Stuðningsmenn Bayern tóku vel á móti Lewandowski við endurkomuna þrátt fyrir opinbert rifrildi hans við stjórn félagsins í sumar. Þar gerði pólski markaskorarinn allt í sínu valdi til að vera seldur frá Bayern.
„Ég er mjög þakklátur stuðningsmönnunum í München fyrir hvernig þeir tóku á móti mér. Þeir sýndu mér virðingu, þetta var mjög fallegt af þeim og mikilvægt fyrir mig. Ég var í München í átta ár, ekki tvö eða þrjú. Það er ekki hægt að gleyma því," sagði Lewandowski.
Lewandowski er 34 ára gamall og er búinn að skora 11 mörk í 8 keppnisleikjum hjá Barca. Hann skoraði 344 í 375 leikjum með Bayern, ótrúlegar tölur.