Mullins: Einbeittir að eigin frammistöðu

Watford getur enn bjargað sér frá falli úr ensku úrvalsdeildinni er liðið heimsækir Arsenal í lokaumferð ensku úrvalsdeildarinnar sem fer fram í dag.

Það gæti orðið erfið þraut fyrir Watford þó andstæðingarnir séu aðeins að spila uppá stoltið. Watford er jafnt Aston Villa á stigum en með aðeins lakari markatölu eins og sést á stöðutöflunni hér fyrir neðan.

„Ég held að strákarnir hætti að hugsa um Aston Villa um leið og flautað verður til leiks á Emirates. Þeir þurfa að einbeita sér að starfinu innan vallar, þeir hafa ekki tíma til að hugsa um hvað er að gerast utan hans," segir Mullins.

Vanalega eru það læti stuðningsmanna sem gefa leikmönnum upplýsingar um stöðu annarra leikja í lokaumferðinni en í ár eru engir stuðningsmenn á pöllunum.

„Við verðum held ég ekki með mann sem horfir á hina tvo leikina sem skipta okkur máli. Við munum fylgjast með stöðunni en verðum ekki með mann að horfa á leikina.

„Við verðum að einbeita okkur að eigin frammistöðu, við megum ekki eyða kröftum í að pæla í einhverjum öðrum leikjum."