„Held að það sé ekki langt í að við sjáum hann í A-landsliði Íslands"

„Sóknarleikurinn er frábær í fyrri hálfleik þar sem við sköpum urmul af færum og skorum tvö góð mörk. Við höldum áfram í seinni hálfleik og erum áræðnir."

Mörkin hjá Keflavík voru virkilega falleg í kvöld. „Ég er hrikalega ánægður með strákana."

Eiður Orri Ragnarsson átti stórleik í liði Keflavíkur og skoraði tvö mörk, var óheppinn að skora ekki þrennu í leiknum. „Eiður var frábær hérna í dag ásamt fleirum. Hann er búinn að vera aðeins út úr liðinu og á bekknum. Hann kemur með alvöru svar þegar hann kemur inn í liðið," sagði Haraldur Freyr.

Davíð Helgi Aronsson, sem hefur leikið vel með Keflvíkingum í sumar á láni frá Víkingum, er farinn til Lyngby í Danmörku. Haraldur hefur ekkert nema gott um hann að segja.

„Davíð er frábær leikmaður og er búinn að standa sig hrikalega vel fyrir okkur. Auðvitað vissum við að ef hann myndi standa sig vel yrði mjög líklegt að hann yrði lánaður eða keyptur í erlent félag. Við bjuggumst við því. Við óskum honum góðs gengis á nýjum stað."

„Þakið er helvíti hátt hjá honum. Hann getur farið eins langt og hann vill. Ég held að það sé ekki langt í að við sjáum hann í A-landsliði Íslands," sagði þjálfari Keflvíkinga en allt viðtalið má sjá í spilaranum hér að ofan.