Dómgæslan í aðalhlutverki í Krikanum - „Blikar alveg brjálaðir!“

Staðan er markalaus í hálfleik í viðureign FH og Breiðabliks í Bestu deildinni. Leikurinn hefur þó ekki verið tíðindalaus en Blikar eru ekki sáttir við dómgæsluna.

Um miðjan fyrri hálfleik var mark dæmt af Blikum, Ívar Örn Árnason skallaði boltann inn en brot var dæmt í teignum.

„Markið átti að standa sýnist mér. Dagur Örn sem kemur með sendinguna inn á teig úr aukaspyrnu og Ívar nær skallanum og stangar hann í nær. Það er síðan dæmt á Ásgeir Helga og sagt að hann hafi brotið á Tómasi Orra, við fyrstu sýn í endursýningum finnst mér bara nákvæmlega ekki neitt á þetta," skrifaði Haraldur Örn Haraldsson í textalýsingu frá Krikanum.