Jökull Elísabetarson, þjálfari Stjörnunnar
„Leikurinn var mjög erfiður. Svo sem nákvæmlega eins og við áttum von á. Við áttum von á að það gæti verið fast leikatriði sem myndi skera um úrslitin þannig mér fannst við sterkir þar og ég hefði viljað sjá okkur nýta færin sem við komum okkur í, sérstaklega í fyrri hálfleik." sagði Jökull Elísabetarson þjálfari Stjörnunnar eftir tapið gegn KR á Meistaravöllum í kvöld.
Lestu um leikinn: KR 1 - 0 Stjarnan
Tapið hjá Stjörnunni í kvöld á Meistaravöllum var fyrsta tap Jökuls Elísabetarsonar undir hans stjórn og var Jökull spurður hvað það þýði fyrir framhaldið.
„Það þýðir ekki neitt. Við gerum bara það sama eins og eftir sigurleiki .Við skoðum hvað við getum gert betur og gerum það og það er stutt í að við komum á þennan völl aftur þannig við verðum klárir."
KR er uppeldisfélag Jökuls Elísabetarsonar og segir Jökull alltaf gaman að koma á KR völl en hann var að mæta á Meistaravelli í fyrsta skipti sem aðalþjálfari.
„Alltaf gaman að koma á KR völl, alveg sama hvort þú sért leikmaður eða þjálfari eða hvað sem er. Það er sjarmi yfir þessum velli þannig það hefði verið gaman að fá meira út úr þessum leik því mér fannst við vinna fyrir því."
