Sölvi Snær kominn með leikheimild hjá Grindavík

Sölvi Snær Ásgeirsson fékk í vikunni leikheimild með Grindavík en hann er mættur aftur til landsins eftir lánsdvöl hjá LASK í Austurríki. Þetta staðfestir Sigurður Óli Þórleifsson, formaður fótboltadeildar Grindavíkur, í samtali við Fótbolta.net.

Sölvi fór vel af stað í Austurríki og lék æfingaleik með aðalliði LASK síðasta sumar en varð svo fyrir meiðslum sem settu stórt strik í reikninginn í vetur og náði einungis að spila nokkra leiki með varaliðinu sem spilar í þriðju efstu deild Austurríkis.

LASK var með kauprétt í lánssamningnum en vegna meiðslanna ákvað austurríska félagið að nýta ekki þann möguleika.

Talsverðan tíma tók að fá leikheimildina, Sölvi varð átján ára í lok maí og tók félagaskiptaferlið nokkrar vikur.