Ísland áfram taplaust á toppnum

Íslenska karlalandsliðið lauk þessu landsleikjaverkefni með markalausu jafntefli við Eistland í Tallinn í kvöld og er áfram á toppi D-riðils C-deildar Þjóðadeildarinnar.

Ísland byrjaði ágætlega og snemma leiks sendi Hörður Björgvin Magnússon langan bolta fram á Orra Stein Óskarsson sem var að sleppa í gegn. Varnarmaður Eistlands virtist stöðva boltann með hendi en ekkert var dæmt.

Á 12. mínútu töldu Íslendingar sig hafa komið boltanum yfir línuna eftir hornspyrnu Gylfa Þórs Sigurðssonar. Andri Lucas Guðjohnsen kom boltanum að marki og Eistar lentu í vandræðum áður en þeir náðu að hreinsa. Spurningin var hvort boltinn hefði farið allur yfir línuna en markið var ekki dæmt og leikurinn hélt áfram.

Eistar sköpuðu sér meira eftir því sem leið á hálfleikinn en Hákon Rafn Valdimarsson var öruggur í sínum aðgerðum og kom Íslandi til bjargar, eins og svo oft áður í þessu verkefni. Með frammistöðu sinni hefur hann fest sig í sessi sem aðalmarkvörður landsliðsins.

Heimamenn voru einnig líklegri til að skora í síðari hálfleik. Hákon greip meðal annars inn í á hárréttu augnabliki og kastaði sér á boltann þegar Eistar voru að komast í dauðafæri. Ísland náði betur tökum á leiknum undir lokin og leitaði að sigurmarkinu.

Brynjólfur Andersen Willumsson fékk eitt síðasta færi til að skora sigurmarkið, en Eistar björguðu á línu.

Annað jafnteflið við Eista varð því niðurstaðan en stigið heldur Íslandi í góðri stöðu. Liðið er á toppnum með átta stig, tveimur stigum á undan Eistlandi. Þá hélt Ísland hreinu þriðja leikinn í röð sem er mjög jákvætt.

Ísland mætir Lúxemborg og Búlgaríu í næsta mánuði og tryggir sér efsta sætið með sigrum í báðum leikjum.