Úrvalslið Pepsi Max-kvenna 2021

Sjá einnig:
Heimavöllurinn: PEPSI MAX UPPGJÖR 2021


Tiffany Sornpao - Keflavík
Átti virkilega gott tímabil, Keflavík hélt sér uppi sem nýliði og Tiffany átti stóran þátt í því. Keflavík fékk einungis á sig 26 mörk í sumar.

Mist Edvardsdóttir - Valur
Fyrst á blað er Mist Edvardsdóttir, besti leikmaður mótsins. Færð úr tíunni í vörnina, gekk talsvert betur í miðverðinum. Hún var frábær í allt sumar, algjör nagli! Hlustið á viðtalið við hana, enginn svikinn af þeirri hlustun.

Málfríður Anna Eiríksdóttir - Valur
Hinn hlutinn af besta miðvarðapari deildarinnar. Málfríður var færð niður í miðvörðinn og blómstraði þar við hlið Mistar.

Arna Sif Ásgrímsdóttir - Þór/KA
Þór/KA er mikið varnarlið og Arna er best í vörn í liðinu. Mikill leiðtogi, frábær í loftinu og hefur aldrei verið í betra standi. Hún er líklega að gera sig klára fyrir atvinnumennsku.

Dóra María Lárusdóttir - Valur
Stórkostleg með Val í sumar, það er ekki hægt að hrósa henni nóg. Var að vinna sinn áttunda Íslandsmeistaratitil. Þvílík fyrirmynd og gefur Valsliðinu mikið. Þetta var eitt af hennar bestu tímabilum, hún hlýtur að halda áfram og taka allavega eitt tímabil í viðbót!

Katie Cousins - Þróttur
Frábær á miðjunni hjá Þrótti og ekki hægt að sleppa því að velja hana. Besti leikmaður Þróttar í sumar. Boltinn er límdur við hana og á augnablikum í leikjum gerði hún hluti sem urðu til þess að Þróttur náði góðum úrslitum.

Lára Kristín Pedersen - Valur
Spilaði einungis níu leiki en á sæti í liðinu verðskuldað. Gengi Vals eftir komu Vals var frábært, kom með mikla festu inn á miðjuna og kaupin á henni eru bestu kaupin á tímabilinu. Það var ekki spurning hvert titilinn færi eftir að hún kom inn í liðið.

Áslaug Munda Gunnlaugsdóttir - Breiðablik
Hægri kantur, vinstri löpp. Á deginum var hún besti leikmaður deildarinnar. Flott að sjá hana koma til baka eftir erfiðleikana í fyrra. Þegar hún er á sínum degi gerir hún það sem hún vill gera, getur labbað í gegnum vörn andstæðinganna.

Agla María Albertsdóttir - Breiðablik
Stendur alltaf fyrir sínu og hún er sennilega það fyrsta sem þú leggur upp með að stoppa ef þú ert að mæta liði sem Agla María er í. Hún lagði upp mikið af mörkum og skoraði næstmest í deildinni. Þvílíkur leikmaður.

Brenna Lovera - Selfoss
Markahæst í deildinni. Kom pínu óvænt aftur inn í deildina eftir að hafa spilað með ÍBV. Það er þvílíkur kraftur í henni. Hún er með allt öðruvísi element en flestir leikmenn.

Elín Metta Jensen - Valur
Hún var svolítið lengi í gang en á endanum kom þetta. Þetta var ekki besta tímabilið hennar en hún var þrátt fyrir það frábær, gerir svo mikið annað en bara að skora. Hún er þessi fyrsti varnarmaður sem er vanmetið hlutverk. Hún er klár í öll návígi og fer inn í þau öll til að vinna þau.

Þjálfari ársins - Nik Anthony Chamberlain hjá Þrótti
Frábær þjálfari, öflugur að velja erlenda leikmenn og góður í að vinna með ungum leikmönnum. Liðið endar í 3. sæti og kemst í bikarúrslit. Hann leggur leikina vel upp, undirbýr sig gríðarlega vel. Leikmenn sjá að þær eru að vaxa undir hans stjórn, lítil ástæða til að halda annað.

Efnilegastar 2021:
Andrea Rut Bjarnadóttir - Þróttur
Hildigunnur Ýr Benediktsdóttir - Stjarnan
Áslaug Dóra Sigurbjörnsdóttir - Selfoss
Ólöf Sigríður Kristinsdóttir - Þróttur
Þóra Björg Stefánsdóttir - ÍBV
Jelena Tinna Kujundzic - Þróttur